Topson, Arteezy, Ceb нарын TI15-д оролцох "мөрөөдөл" талаар болов

Dota 2-ын домогт тоглогчид болох Topias 'Topson' Taavitsainen, Artour 'Arteezy' Babaev, Sébastien 'Ceb' Debs нараас бүрдсэн Retirement Home баг Европын бүсийн The International 2026 (TI15) тэмцээний хоёр дахь Нээлттэй Сонгон шалгаруулалтад 1p2m багт 2:0-ээр ялагдсанаар энэ жилийн дэлхийн аваргын тэмцээнд оролцох боломжоо бүрэн алдлаа.

Retirement Home баг хэдхэн хоногийн өмнө болсон эхний Нээлттэй Сонгон шалгаруулалтад мөн шөвгийн 16-д L1GA Team багт хожигдож байсан. Харин хоёр дахь бөгөөд сүүлчийн боломж дээрээ Зүүн Европын 1p2m багтай таарч, дахин шөвгийн 16-ийн шатнаас тэмцээнээ өндөрлүүлэв.

Цувралын эхний тоглолт 39 минут, хоёр дахь тоглолт 36 минут үргэлжилсэн бөгөөд 1p2m баг хоёр тоглолт дараалан ялж, Хаалттай Сонгон шалгаруулалтын эрхийн төлөөх өрсөлдөөнөө үргэлжлүүлэхээр болсон юм.

Ингэснээр Retirement Home баг The International 2026 тэмцээнд шалгарах бүх боломжоо алдлаа.

Домгуудын бүрэлдэхүүн ч Европын бүсээс гарч чадсангүй

Retirement Home багийн бүрэлдэхүүнд:

• Artour 'Arteezy' Babaev

• Topias 'Topson' Taavitsainen

• Max 'qojqva' Bröcker

• Axel 'Pablo' Källman

• Sébastien 'Ceb' Debs нар багтсан байв.

Эдгээр тоглогчид нийлээд гурван удаагийн The International аваргын цолтой. 'Topson' болон 'Ceb' нар 2018, 2019 онд OG багийн хамтаар TI-ийн дараалсан хоёр түрүү хүртэж байсан бол 'Arteezy' нь Dota 2-ын түүхэн дэх хамгийн алдартай тоглогчдын нэгээр нэрлэгддэг.

Retirement Home нь аваргын төлөөх бодит өрсөлдөөнөөс илүүтэйгээр хөгжөөн дэмжигчдэд зориулсан контентын төсөл байсан гэж олон хүн үзэж байна.

Багийн тоглогчид сонгон шалгаруулалтын тоглолтуудаа шууд дамжуулж, олон мянган үзэгчийг татсан бөгөөд Reddit болон олон нийтийн сүлжээнд энэ оны хамгийн сонирхолтой Dota 2 контентуудын нэг хэмээн үнэлэгдэж байв.

Хэдийгээр TI15-д хүрч чадаагүй ч Dota 2-ын хамгийн алдартай үеийн тоглогчид дахин нэг дор нэгдэн тоглосон нь хөгжөөн дэмжигчдэд дурсамжтай мөчүүдийг үлдээж чадлаа.

Харин стример Janne 'Gorgc' Stefanovski-ийн бүрдүүлсэн Team Bald Reborn баг Европын хоёр дахь Нээлттэй Сонгон шалгаруулалтад амжилттай оролцож байна.

Тэд шөвгийн 16-д Zero Tenacity багийг буулган авч шилдэг наймд шалгарсан бөгөөд Хаалттай Сонгон шалгаруулалтын эрх авахад ердөө нэг цувралын ялалт дутуу байгаа юм.

---

Valve энэ жил The International 2026 тэмцээнд ердөө долоон багт шууд урилга олгосон.

Шууд урилга авсан багууд:

• Aurora Gaming

• BoomBoys

• Team Falcons

• Team Liquid

• Tundra Esports (багаа татан буулгаж, бүрэлдэхүүн нь 1win багт шилжсэн)

• Xtreme Gaming

• Team Yandex

Үлдсэн багууд бүсийн сонгон шалгаруулалтаар эрхээ авах ёстой бөгөөд Европын бүс хамгийн өрсөлдөөнтэй бүсүүдийн нэгээр нэрлэгдэж байна.

The International 2026 (TI15) тэмцээн энэ жил БНХАУ-ын Шанхай хотод 8-р сарын 13-23-ны хооронд зохиогдоно. Энэ нь Dota 2 төрлийн хамгийн нэр хүндтэй дэлхийн аварга шалгаруулах тэмцээн бөгөөд нийт 16 баг оролцдог.

Шанхай хотын Oriental Sports Center аренад шилдэг 16 баг дараах хэлбэрээр өрсөлдөнө.

·       Group Stage: 8-р сарын 13–16

·       Main Event: 8-р сарын 20–23  

Group Stage

·       Swiss System формат

·       Багууд хэд хэдэн шатны тоглолт хийж, шилдэг 8 нь плейоффт шалгарна. (Dota 2)

Main Event

·       Плейоффын формат одоогоор бүрэн зарлагдаагүй байна.

·       Valve дараагийн шатны дэлгэрэнгүй мэдээллийг дараа танилцуулах юм.